QUALITY EDUCATION AND JOB OPPORTUNITIES FOR ALL

CLSU Commencement Exercises - Central Luzon State University, Science City of Muñoz, Nueva Ecija, April 14, 2005

MAGANDANG UMAGA… BAYAN

AKO PO’Y NATUTUWA NA MAKASAMA KAYONG LAHAT NGAYONG ARAW NA ITO PARA SA PAGTATAPOS NG ATING MGA NATATANGING MAG-AARAL DITO SA CENTRAL LUZON STATE UNIVERSITY O CLSU. MAHALAGA SA AKIN ANG OKASYONG ITO HINDI LAMANG DAHIL AKO AY INYONG GINAWARAN NG DOCTOR OF HUMANITIES SUBALIT HIGIT SA LAHAT, DAHIL MALAPIT SA PUSO KO ANG MGA KABATAANG TULAD NINYO NA NAGSUMIKAP UPANG MAKAPAGTAPOS NG PAG-AARAL.

TAOS-PUSO ANG AKING PASASALAMAT SA INYONG LAHAT LALONG LALO NA SA MGA BUMUBUO NG PAMUNUAN NG CLSU PARA SA NATATANGING KARANGALANG ITO.

ANG DOCTOR OF HUMANITIES AY TUNAY NA MAIPAGMAMALAKI SAPAGKAT ANG CLSU ANG PANGUNAHING INSTITUSYONG PANG-EDUKASYON SA LARANGAN NG AGRIKULTURA DITO SA PILIPINAS AT SA BUONG SOUTH EAST ASIA. KAUGNAY NITO, ISA ANG CLSU SA PINAGMUMULAN NG MGA MAHUHUSAY AT MAAASAHANG EXPERTS DITO SA GITNANG LUZON, PATI NA RIN SA BUONG BANSA.

ANG CLSU RIN ANG NANGUNGUNANG INSTITUSYON DITO SA SCIENCE CITY OF MUÑOZ PARA SA PAGTATAGUYOD NG MGA ADHIKAIN NG LUNGSOD NA MAPAUNLAD ANG KARUNUNGAN SA LARANGAN NG AGHAM O SCIENCE. DAHIL DITO, MAKABULUHAN ANG GINAGAMPANANG PAPEL NG CLSU, KUNG KAYA’T BAWAT TAGUMPAY NITO AY MAITUTURING NA TAGUMPAY DIN NG REGION III, AT NATING LAHAT NA NAGHAHANGAD NG KAUNLARAN PARA SA BAYAN.

MARAHIL, ISA SA MGA DAHILAN NA NAGBUNSOD SA INYO PARA GAWARAN AKO NG DOCTOR OF HUMANITIES AY ANG INYONG PAGSANG-AYON SA AKING ILANG PANINIWALA AT PRINSIPYO PARA SA MASA AT GANOON DIN SA LARANGAN NG PAMAMAHAYAG. AKO PO AY NANINIWALA SA ANGKING KAKAYAHAN NG BAWAT ISA NA MAIANGAT ANG KALAGAYAN NG ATING BANSA SA PAMAMAGITAN NG PAGTUTULUNGAN NA MAISAKATUPARAN ANG ATING MGA TUNGKULIN NA NAAAYON SA PANGANGAILANGAN NG NAKARARAMI NATING KABABAYAN. LUBOS ANG AKING PAGHAHANGAD NA LAHAT NG SEKTOR NG LIPUNAN AY MAGKAISA PARA SA IISANG LAYUNIN.

ALAM NAMAN NINYO NA MALAKING BAHAGI NG AKING BUHAY ANG GINUGOL KO SA LARANGAN NG BROADCASTING. DALAWAMPU’T PITONG TAON AKO SA LARANGANG ITO AT ITINURING KO ITONG PARAAN NG PAGLILINGKOD SA BAYAN. SA MGA NAGDAANG TAONG IYON, SINIKAP KONG MAGING UNA SA LAHAT ANG PANGKARANIWANG MAMAMAYAN UPANG MAPANSIN ANG KANILANG MGA PANGANGAILANGAN AT HINAING SA BUHAY. SINIKAP KO RING MALIWANAGAN SILA O ANG LAHAT NG KATWIRAN NG MGA USAPING NAKAKAAPEKTO SA KANILANG BUHAY.

NGAYON, BILANG PANGALAWANG PANGULO NG BANSA, PINUNO NG HOUSING AND URBAN DEVELOPMENT COORDINATING COUNCIL O HUDCC, AT ALTERNATE CHAIRMAN NG NATIONAL ANTI-POVERTY COMMISSION, MAPALAD AKO SAPAGKAT LALO AKONG NAPALAPIT SA MASANG PILIPINO. SA PAGKAKATAONG ITO, HINDI NA LAMANG AKO NAGSISILBING BOSES NG BAYAN SUBALIT, KAISA NA AKO SA MGA NANGUNGUNA PARA SA PAGHAHANAP AT PAGSASAGAWA NG MGA SOLUSYON UPANG MABIGYAN NG KALUTASAN ANG MGA PROBLEMA NAGPAPABAGAL SA ATING PAG-UNLAD.

NAIS KONG IBAHAGI SA INYO NA KABILANG SA 10-POINT AGENDA NG PANGULONG GLORIA MACAPAGAL-ARROYO AY ANG: 1) PAGPAPALAGO NG OPORTUNIDAD PARA SA PAGKAKAROON NG DAGDAG NA ANIM NA MILYONG TRABAHO PARA SA MANGGAGAWANG PILIPINO HANGGANG 2010; 2) PAGBIBIGAY NG MGA SCHOLARSHIP AT PAGPAPATAYO NG MGA SILID-ARALAN AT IBA PANG KAGAMITAN AT PASILIDAD PANG-EDUKASYON; AT 3) PAGTATALAGA NG MGA CORE GOVERNMENT AT HOUSING CENTERS SA LUZON, VISAYAS AT MINDANAO UPANG MATUGUNAN ANG PANGANGAILANGAN NG BAWAT MAMAMAYAN LALO NA SA MGA LIBLIB NA LUGAR. SA MGA RESPONSIBILIDAD NA TINALAGA NG PANGULO SA AKIN. PANGUNAHIN DITO AY ANG PAGTUGON SA HOUSING AND SOCIAL NEEDS OF THE “BOTTOM 30 PERCENT” OF THE POPULATION.

PARA SA MGA ESTUDYANTENG NAGSISIPAGTAPOS NGAYON, MAGANDANG BALITA ANG PROGRAMA NG ATING PAMAHALAAN NA LUMIKHA NG HANAP-BUHAY SAPAGKAT BATID NG LAHAT ANG HIRAP SA PAGHAHANAP NG TRABAHO SA MGA PANAHONG ITO NA NAG-UUGAT SA PROBLEMANG PANG-EKONOMIYA. RAMDAM MAN NATIN NGAYON ANG KAHIRAPAN, NANINIWALA AKO NA MALALAGPASAN NATIN LAHAT ANG MGA BALAKID SA BUHAY BASTA’T MAY DETERMINASYON AT PAGPAPAHALAGA SA KABULUHAN NG PARTISIPASYON NG BAWAT ISA PARA SA PAG-UNLAD NG ATING BANSA.

TULAD NG KARAMIHAN NA NANDITO NGAYON, AKO AY NAGMULA DIN SA ISANG PANGKARANIWANG PAMILYA, SUBALIT HINDI IYON NAGING HADLANG UPANG MAKAMIT KO ANG AKING MGA PANGARAP SA BUHAY AT MAKAPAGBAHAGI SA KAPWA. HINDI NAGING MADALI PARA SA AKIN ANG PAG-AHON MULA SA KAHIRAPAN NGUNIT DINALA AKO NG AKING DETERMINASYON KAAKIBAT NG PAG-ASANG MAY PATUTUNGUHAN ANG BAWAT PAGSISIKAP. AT DAHIL SA MGA PAGSISIKAP NA IYON, AKO AY PINALAD NA MABIYAYAAN NG PAGKAKATAONG LALONG MAKAPAGLINGKOD PA SA BAYAN.

SA ILANG TAON KONG PANINILBIHAN, SA GOBYERNO, MARAMING BESES KONG NAITANONG SA AKING SARILI KUNG ANO BA ANG MAAARI NATING GAWIN UPANG MAPABILIS ANG PAG-UNLAD NG ATING EKONOMIYA SA KABILA NG IBA’T IBANG KRISIS NA ATING KINAKAHARAP. DAHIL DITO, NABUO SA ISIP KO NA MAAARI DING MAKAMTAN ANG KAUNLARAN BASTA’T MAISAALANG-ALANG NATIN ANG ILANG MGA BAGAY TULAD NG PAGPAPALAWAK NG: 1) GOOD GOVERNANCE AT TRANSPARENCY SA PAMAMALAKAD NG BURUKRASYA; 2) PAGKAMIT NG ISANG STABLE MACROECONOMIC ENVIRONMENT NA SIYANG BATAYAN NG MASIGLANG KALAKALAN AT PAMUMUHUNAN; 3) PAGKILALA SA KARAPATAN NG BAWAT ISA AT PAGKAKAPANTAY-PANTAY NATING LAHAT SA MATA NG BATAS AT PANGINOON; 4) PAGPUKSA NG KRIMINALIDAD; AT 5) PAGSASAKATUPARAN NG MGA PROGRAMANG NAGLALAYONG MAGBIGAY NG SOCIAL SAFETY NETS UPANG MAPAUNLAD ANG ANTAS NG PAMUMUHAY LALO NA SA MGA PROBINSYA NA HINDI PA NAAABOT NG ATING MGA KASALUKUYANG PROGRAMA.

MAHALAGA ANG MGA BAGAY NA ITO SAPAGKAT NAKASALALAY SA PAG-UNLAD NG EKONOMIYA ANG MATAGAL NA NATING MINIMITHING PAG-AHON SA KAHIRAPAN. NANINIWALA AKONG KAKAYANIN NATIN ANG PAGSASAAYOS NG MGA BAGAY NA ITO BASTA’T TAOS-PUSO ANG ATING PAGTUTULUNGAN. SANA ISAPUSO NATING LAHAT NA ANG PAG-UNLAD AY HINDI LAMANG NAKASALALAY SA ATING PAMAHALAAN KUNDI SA MAAYOS NA PAGGANAP NG BAWAT ISA NG KANYA-KANYANG TUNGKULIN PARA SA BAYAN.

NAIS KONG IHALINTULAD ANG PAG-UNLAD NG ATING BAYAN SA PROGRAMANG PABAHAY NG PAMAHALAAN KUNG SAAN ITO AY GINAGAMPANAN HINDI LAMANG NG IISA KUNDI NG IBA’T IBANG MGA AHENSYA NG GOBYERNO, KATULONG ANG PRIBADONG SEKTOR, BUHAT SA MGA DEVELOPERS, MGA NON-GOVERNMENT ORGANIZATIONS AT MGA BENEFICIARIES O KOMUNIDAD. GANOON DIN ANG PAG-UNLAD NG BUONG BANSA, KUNG KAYA’T BAWAT PAGSISIKAP NG ISA SA ATIN AY MAITUTURING NA ISANG HAKBANG TUNGO SA MAS MATAAS NA ANTAS NG PAMUMUHAY.

MABUHAY ANG CLSU. MABUHAY ANG MGA MASISIGASIG NA ESTUDYANTENG MAGTATAPOS SA ARAW NA ITO. MABUHAY ANG INYONG MGA MAHAL NA MAGULANG AT MGA GURO. KAYO ANG PAG-ASA NG BAYAN. AKO AY NAGPUPUGAY SA INYONG ANGKING TALINO AT KAKAYAHANG MAKAPAG-AMBAG SA PAG-UNLAD NG ATING BAYAN.

MARAMING SALAMAT PO AT MULI MAGANDANG UMAGA SA INYONG LAHAT.

home   |   Speeches main page   |