HOUSING

Launching of the BANGSAMORO PABAHAY PROJECT, 17 September 2004

ASSALAMU ALAIKUM WARAHMATTULLAHI WABARAKATUH!

ISANG PAGPUPUGAY SA ATING KALIHIM NG KAGAWARAN NG PAGPAPAUNLAD PANLIPUNAN (DSWD) DINKY SOLIMAN, KAGALANGGALANG NA GOBERNADOR WAHAB MUHTAMAD AKBAR, BISE GOBERNADOR AL-RASHEED SAKKALAHUL, KALIHIM NG DSWD-ARMM HADJA BAINON G. KARON AT SA ATING MGA MASIGLANG OPISYAL NG LOKAL NA PAMAHALAAN NG TUBURAN, BASILAN SA PANGUNGUNA NI MAYOR KALLAHAL S. DURIE AT BISE MAYOR MUHAYMIN I. SAHI.

MAKASAYSAYAN ANG HAPONG ITO DAHIL SA PAGBUBUKAS NG ISANG MAKABULUHANG PROYEKTO NA INAASAHANG MAKAKAPAGPABAGO SA BUHAY NG MGA KAPATID NATING MUSLIM ... ANG BANGSAMORO PABAHAY PROJECT.

BINIGBIGYANG PUGAY KO RIN ANG MGA KAWANI NG KAGAWARAN NG PAGAWAIN AT LANSANGANG BAYAN (DPWH) AT SA 52ND ENGINEERING BATTALION NG HUKBONG KATIHAN NG PILIPINAS (PHILIPPINE ARMY) SA KANILANG INISYATIBO NA MAITAYO ANG MGA PABAHAY PARA SA ATING MGA KAPATID NA MUSLIM DITO SA TUBURAN, BASILAN.

SA PANGUNGUNA NG DSWD AT ILAN PANG KAGAWARAN NG LOKAL AT PAMBANSANG PAMAHALAAN AT GANUN DIN SA TULONG NG PHILIPPINE-CANADIAN DEVELOPMENT FUND (PCDF) AY MATAGUMPAY NA NATAPOS ANG LIMAMPU’T WALONG (58) PABAHAY. ITO AY BAHAGI LAMANG NG HUMIGIT KUMULANG NA TATLONG – DAAN AT LABING-ANIM (316) NA PABAHAY NA PINONDUHAN NG DSWD-NATIONAL OFFICE.

KABAHAGI RIN ITO NG ISANG MALAWAKANG PROYEKTONG PABAHAY SA LIMANG MUNISIPYO NG BASILAN... TIPO-TIPO, LANTAWAN, MALUSO, TUBURAN AT SUMISIP. ANG MGA PROYEKTONG ITO ANG MAGSUSULONG SA PAG-UNLAD NG KABUHAYAN AT MAGBIBIGAY DANGAL SA MGA KAPATID NATING MUSLIM NA RESIDENTE NG BASILAN.

ITO AY ISANG NAPAKAHALAGANG TUGON SA ADHIKAIN NG KASALUKUYANG ADMINISTRASYON, SA PAMUMUNO NI PANGULONG GLORIA MACAPAGAL-ARROYO, NA SUGPUIN ANG KAHIRAPAN AT IBA PANG SULIRANIN NG BANSA SA PAMAMAGITAN NG INILATAG NIYANG 10 POINT AGENDA O MAS KILALA NA “BEAT THE ODS.”

B-BALANCED BUDGET

E-EDUCATION

A-AUTOMATED ELECTIONS

T-TRANSPORT INFRASTRUCTURE

T-TERMINATE NPA AND MILF HOSTILITIES

H-HEAL THE WOUNDS OF EDSA 1,2 AND EDSA 3

E-ELECTRICITY FOR ALL

O - OPPORTUNITIES FOR LIVELIHOOD AND JOBS

D-DECONGESTION OF METRO MANILA

S-SUBIC-CLARK ALLIANCE

MATUTURING DIN NA ISA NGA ITONG KATUGUNAN SA “DECONGESTION NG METRO MANILA” SA PAMAMAGITAN NG PAGTATAYO NG MGA PABAHAY SA LUZON, VISAYAS AT MINDANAO.

TULAD NANG LAGI KONG NABABANGGIT BILANG PANGALAWANG PANGULO AT ALTERNATE CHAIR NG NATIONAL ANTI-POVERTY COMMISSION (NAPC), NAIS KO PONG IPAHAYAG SA INYO ANG ISANG MAGANDANG BALITA. KATATAPOS LANG LAGDAAN NG NAPC, NATIONAL LIVELIHOOD SUPPORT FUND (NLSF) AT LAND BANK OF THE PHILIPPINES (LBP) ANG ISANG MEMORANDUM OF AGREEMENT (MOA) NA NAGLALAAN NG PANIMULANG PONDO NA NAGKAKAHALAGA NG ISANG DAANG MILYONG PISO (P 100,000,000) PARA SA PEOPLE’S DEVELOPMENT TRUST FUND (PDTF). ANG PDTF AY NAATASANG PONDOHAN ANG MGA “CONSULTANCY AND TRAINING SERVICES” PARA SA MGA MICROFINANCE INSTITUTIONS (MFIs), “SCHOLARSHIP AND TRAINING GRANTS” PARA SA MGA MICROFINANCE STAFF AND CLIENTS AT “LIVELIHOOD AND MICRO ENTERPRISE TRAINING SERVICES.”

SA PAGSUGPO SA KAHIRAPAN, PRIORIDAD NG NAPC ANG PAGLIKHA NG KABUHAYAN, TRABAHO AT ISANG MARANGAL NA TAHANAN PARA SA BAWAT MAMAMAYAN. LAYUNIN DIN NG NAPC NA MATULUNGAN NG PDTF NA SUPORTAHAN AT SANAYIN PA ANG IBA’T IBANG MICROFINANCE INSTITUTIONS (MFIs).

SA GANANG AKIN, SA MGA MFI’s PO KAYO PUWEDENG MAKAUTANG PARA SA INYONG IBA’T IBANG PANGANGAILANGANG PANG-KABUHAYAN.

LAYUNIN KO RING PALAKASIN PA ANG PARTISIPASYON NG MGA LOKAL NA PAMAHALAAN AT PRIBADONG SEKTOR PARA ITAGUYOD ANG MGA PROGRAMA AT PROYEKTONG TULAD NITO AT SISIGURADUHIN NATING MAYROON SILANG SAPAT NA PONDO PARA SA MGA SERBISYONG PAMPUBLIKO.

AT BILANG CHAIRMAN NG HOUSING AND URBAN DEVELOPMENT COUNCIL (HUDCC), TUTUTUKAN DIN NATIN ANG PANGANGAILANGAN SA PABAHAY SA PAMAMAGITAN NG MGA “POLICY REFORMS” NA IPINATUTUPAD TULAD NG: 1) PAGBABAWAS NG INTEREST RATE PARA SA MGA HOUSING LOANS; 2) PAGPAPABABA NG MONTHLY AMORTIZATION NG DALAWAMPU (20) HANGGANG DALAWAMPU’T LIMANG (25) PORSIYENTO; 3) AT PAGPAPAHABA NG TERMINO NG UTANG HANGGANG TATLUMPUNG (30) TAON. PATI ANG BILANG NG ARAW NG PAGPO-PROSESO NG LOAN APPLICATION AY PWEDE NANG TAPUSIN SA LOOB NG PITONG (7) ARAW MULA SA DATING TATLUMPONG (30) ARAW.

INAASAHAN DIN NATIN NA ANG MGA PROYEKTONG TULAD NITO AY MAGIGING DAAN TUNGO SA PAGKAKAROON NG MATIBAY AT WALANG KATAPUSANG KAPAYAPAAN SA ATING BANSA, LALONG LALO NA DITO SA MINDANAO.

SA ATING PAGTUTULUNGAN KASAMA ANG LOKAL AT PAMBANSANG PAMAHALAAN GANON DIN ANG IBA’T IBANG NON-GOVERNMENT ORGANIZATIONS (NGO’s), HINDI MALAYONG MAKAMTAN NATIN ANG LAYUNING MAPAUNLAD ANG ANTAS NG PAMUMUHAY NG MAMAMAYANG PILIPINO.

ANG PAGTUTULUNGAN NG IBAT-IBANG AHENSYA NG GOBYERNO AT SEKTOR NG LIPUNAN AY TANDA NG PAGKAKAISA TUNGO SA PANGMATAGALANG KAUNLARAN AT KAPAYAPAAN DITO SA LALAWIGAN NG BASILAN AT MAGING SA BUONG BANSA. KAYA HINAHAMON KO ANG BAWAT ISA SA ATIN NA MAGTULUNGAN, MAGKAISA, AT ISANTABI ANG PAGKAKANYA-KANYA UPANG MAPALAGANAP PA NATIN ANG GANITONG PROYEKTO HINDI LANG DITO SA MINDANAO, BAGKUS MAGING SA IBANG BAHAGI NG BANSA. ITO’Y ISANG HAMON NA DAPAT HARAPIN NG INYONG KOMUNIDAD UPANG MAITAGUYOD ANG MAGANDANG SIMULAIN NG DSWD.

BILANG PAHULING SALITA, ASAHAN PO NINYO NA AKO AT SAMPU NG AKING KASAMAHAN SA AKING TANGGAPAN AT ANG BUONG LIDERATO NI PANGULONG ARROYO AY KAISA SA MGA SUSUNOD PANG MGA MAKABULUHANG PROYEKTO TULAD NITO.

MARAMING SALAMAT AT MULI MABUHAY KAYONG LAHAT!

home   |   Speeches main page   |