TOURISM, YOUTH CONCERNS, LOCAL GOVERNMENT

TALISAY MUNICIPAL HALL BLESSING AND INAUGURATION, TALISAY, BATANGAS, 10 SEPTEMBER 2004, 8:00 AM

ISANG MAPAYAPA AT MAGANDANG UMAGA PO SA INYONG LAHAT.

NAGPAPASALAMAT PO AKO SA INYONG PAANYAYA NA MAGING KABAHAGI SA MAKASAYSAYANG OKASYONG ITO. BINABATI KO RIN PO ANG LAHAT NA NARIRITO SA PANGUNGUNA NG INYONG PINAGPIPITAGANG GOBERNADOR ARMANDO C. SANCHEZ; BISE GOBERNADOR RICKY RECTO; PUNONG BAYAN, FLORENCIO M. MANIMTIM, JR.; IKALAWANG PUNONG BAYAN LUIS H. MALABANAN, GANUN DIN SA MGA KONGRESISTA NG LALAWIGAN NG BATANGAS, MGA MIYEMBRO NG SANGGUNIANG BAYAN AT IBA PANG PANAUHIN.

LUBOS NGANG MAPALAD ANG BAYAN NG TALISAY, DAHIL KAYO AY NABIYAYAAN NG MGA MAGAGANDANG TANAWIN, MAKUKULAY NA KULTURA, MGA TAONG KILALA SA LARANGAN NG SINING AT PULITIKA, AT SAMUT-SARING LIKAS NA YAMAN. AT SA ARAW NA ITO, KAYO PO AY MULING NABIYAYAAN SA PAGKAKAROON NG BAGONG GUSALI NG PAMAHALAANG BAYAN ... MAGSISILBING BANTAYOG NG TAPAT NA PAGLILINGKOD NG INYONG MGA PINUNO … BANTAYOG RIN ITO NG ISANG PUNDASYONG ITINATAG NG INYONG MGA NINUNO ... AT MAGSISILBING HALIGI NG MAUNLAD NA KINABUKASAN SA BAWAT TALISEÑO. (BIGYAN NATIN NG ISANG MASIGABONG PALAKPAKAN ANG MGA MAGANDANG HANGARIN AT MALAWAK NA PANANAW NG MGA NINUNO AT DATING PINUNO NG BAYAN NG TALISAY!)

SAGANANG AKIN, ANG BAYAN NG TALISAY AY UUNLAD AT SUSULONG SA MGA SUSUNOD NA TAON DAHIL NA RIN SA IBAT-IBANG LIKAS NA YAMAN NA MERON DITO … MAGAGAMIT NINYO ITO UPANG MAKAHIKAYAT NG MGA BAGONG MAMUMUHUNAN AT MANGANGALAKAL LALONG-LALO NA SA LARANGAN NG TURISMO …. KAAKIBAT NG LAHAT NA ITO ANG PAGKAKAROON NG TRABAHO PARA SA BAWAT TALISEÑO.

SA SANDALING MAIPATUPAD NG PAMUNUAN NG TALISAY ANG MGA ADHIKAIN NITO SA LOOB NG TATLO HANGGANG LIMANG TAON AY MASASABI NATING NAGAMPANAN AT NAITAGUYOD NATIN ANG ILAN SA 1O-POINT AGENDA NG ATING MAHAL NA PANGULONG ARROYO, NA MAS KILALA BILANG LEGACY AGENDA O BEAT THE OD’S PROGRAM, NA MAY KAHULUGANG B - BALANCED BUDGET; E - EDUCATION; A - AUTOMATED ELECTIONS; T -TRANSPORT INFRASTRUCTURE; T -TERMINATE NPA AND MILF HOSTILITIES; H - HEAL THE WOUNDS OF EDSA 1,2 AND 3; E - ELECTRICITY FOR ALL; O -OPPORTUNITIES OF LIVELIHOOD AND JOBS; D - DECONGESTION OF METRO MANILA; AND S - SUBIC-CLARK ALLIANCE.

LAYUNIN NG KASALUKUYANG ADMINISTRASYON ANG LUMIKHA PA NG ANIM HANGGANG SAMPUNG MILYONG TRABAHO. SA KUNG PAANONG PARAAN ITO MAISASAKATUPARAN AY PRIORIDAD NG ATING GOBYERNO ANG PAGPAPAUNLAD PA NG MAY ISA HANGGANG DALAWANG MILYONG EKTARYA NG ATING MGA LUPAIN PARA SA MGA NEGOSYONG PANG-AGRIKULTURA. ISA ITO SA MAGAGANDANG PAGKAKATAON NA AKING NAKITA PARA SA MGA TALISEÑO, SAPAGKAT ALAM KONG ANG YAMAN NG INYONG BAYAN AY NASA MGA LUPAIN. KAYA HINIHIKAYAT KO PO KAYO NA PAGLINANGIN ANG SARILING YAMAN NG INYONG BAYAN, DAHIL NANINIWALA AKO NA ANG TUNAY NA KABUHAYAN AY NARIRITO.

ISA RIN SA MGA PROYEKTO NG GOBYERNO ANG PAGTATAYO NG MGA “HOUSING CENTERS” SA LUZON, VISAYAS AT MINDANAO. UMASA TAYO NA ANG BATANGAS AY ISA SA MGA MABIBIYAYAAN NG PROYEKTONG ITO, LALO NA AT ALAM NATIN ANG INYONG LOKAL NA PAMAHALAAN AY HANDANG MAKIPAGTULUNGAN.

KAMAKAILAN, NAGKAROON NG KASUNDUAN ANG NATIONAL ANTI-POVERTY COMMISSION, NATIONAL LIVELIHOOD SUPPORT FUND (NLSF), AT LANDBANK OF THE PHILIPPINES, NA MAGTABI NG ISANDAANG MILYONG PISO PARA SA PEOPLE’S DEVELOPMENT TRUST FUND (PDTF) NITONG AGUSTO 16, 2004. ANG PONDONG ITO AY GAGAMITIN SA PAGTATAGUYOD NG MGA MICRO-FINANCING INSTITUTIONS SA MGA PROBINSYA, NA SIYANG MAGBIBIGAY NG KAPITAL PARA SA PAGPAPATAYO NG MGA NEGOSYO UPANG TULUNGAN ANG MGA MAHIHIRAP NA MAGKAROON NG SARILING KABUHAYAN.

BILANG INYONG PANGALAWANG PANGULO AT ALTERNATE CHAIR NG NATIONAL ANTI-POVERTY COMMISSION (NAPC), HINAHAMON KO ANG KASALUKUYANG ADMINISTRASYUN NI MAYOR MANIMTIM NA TUMULONG SA PAGTATAGUYOD NG MGA MICRO-FINANCE INSTITUTIONS AT NG MGA MALILIIT NA NEGOSYO PARA SA IKAUUNLAD NG INYONG BAYAN. INUUDYOKAN KO RIN ANG BAWAT ISA NA NANDITO NGAYON UPANG PANATILIHING MAPAYAPA AT MAAYOS ANG INYONG KAPALIGIRAN NA SIYANG MAGPAPAUSBONG NG TURISMO DULOT NG HINAHANGAAN, HINDI LANG DITO SA ATING BANSA BAGKOS SA BUONG MUNDO, NA TAAL VOLCANO.

NAPAG-ALAMAN KO RIN NA KAMAKAILAN LANG AY TINAWAG DIN ANG BAYANG ITO NA “SEEDLING BOWL OF THE NATION” DAHIL SA PAGKAKAROON NG IBAT-IBANG PUNO AT HALAMAN NA KALIMITAN AY INAANGKAT NG IBANG TAO MULA SA BUONG KAPULUAN. DITO RIN SA INYO MATATAGPUAN ANG PINAKAMASARAP NA TILAPIA, TAWILIS AT MALIPUTO NA DINADAYO PA NG TAGA IBANG LUGAR.

ANG LAHAT NG ITO ANG SIYANG MAGTATAGUYOD SA INYONG PATULOY NA PAG-UNLAD … PATUNAY DITO ANG INYONG BAGONG GUSALI NG PAMAHALAANG BAYAN … DATING MALIIT … NGAYON AY MODERNO AT MAKABAGO ... MAGSISILBING BANTAYOG NG PAGKAKAISA AT PAGTUTULUNGAN NG MGA NAMUMUNO AT MAMAMAYAN NG TALISAY.

SA MAIKLING PANAHON NA KAPILING KO KAYO, SANA AY PAHINTULUTAN NINYONG SABIHIN KONG ISA NA RIN AKONG GANAP NA TALISEÑO DAHIL SA MGA KATANGIANG INYONG PINAMALAS … ANG PAGMAMAHAL NINYO SA KAPALIGIRAN AT LIKAS NA YAMAN … AT HIGIT SA LAHAT, SA INYONG TAPAT NA PAGLILINGKOD SA ATING INANG BAYAN.

MARAMING SALAMAT PO, AT MABUHAY TAYONG LAHAT!

home   |   Speeches main page   |